青心直说：中国 PMI的冰火效应 2010年02月02日
早前讲过市况易跌难升，扑儍瓜炒即市似乎几有效，指数单日波幅够炒几转，但世事往往唔会咁笋，炒到咁上下，大户就会识穿并设下狼来了嘅陷阱，淡友记得走位要快，过年前被挟亲手指就无谓。

大市筑底阶段，个别板块跌势喘定，好似内银同保险股，即使大市再穿底，招商银行同发盈喜嘅中国太保反而有见底回升迹象，所以叫淡友睇淡之余，亦唔好忘记个别股份捞底值博机会。仲有要留意埋先要试 250日线嘅大价股如中石化、中国铝业，喺 250日线有机会反弹，但投资者唔好大贪，因为短线蟹货实在太多。

内地率先公布制造业采购经理指数(PMI)，紧随其后会有美国 PMI。对上一次讲 PMI，系上一潮升浪开展之时，今次再讲，因为 The devil is in the details。

航运股有条件反弹
呢次内地 PMI录得 55.8，表面睇继续高于 50，反映经济继续扩张，但扩张势头见顶，指数较上月回落 0.8个百分点，系 8个月嚟首次下跌，连新增定单都要跌 1.1个百分点至 59.9，令存货数字升至 47.3，即系话开始有货卖唔去，生产商都唔急于落咁多单。

中外传媒一面倒话指数回落反映经济见顶，忘记咗高基数效应问题。睇晒各大行报告，都系美林最简单直接，佢比较过 05至 07年嘅 PMI，发现即使喺高增长时期，平均 1、 2月都只系得 53.6，低于全年其他时间。即系话单睇 1月份数字，根本未能反映中国独特嘅季节性因素──传统春节假期经济活动暂时静止， 2月过后至回复正常。

正因为咁，分析呢个新 PMI数字，应着眼于出口定单同生产成本。两个数字都有升，反映出口需求仍然强劲，但生产成本亦与日俱增，将引发较大通胀。短期睇，中国经济正经历「冰火时期」，外围着晒火，不断增存货；内部就要以冰水救通胀收紧银根。既然外边需求多，暂且唔好炒内需，睇睇航运股，跌定后应有较大条件反弹。

胡孟青