青心直说：发盈喜、价回调入得过 2010年01月28日
同投资银行朋友食饭，话题离不开大市走势，友人是大淡友，担心裂口底部 20800上唔翻，一定落去 19400试底，若然失守埋，玩吓手落 16000咁话。听落难以置信，但基金大举沽货，高盛又早喺去年底折埋只对冲基金，似收到风奥巴马会有 Volcker Rule呢招。

美国打大鳄，英国好有机会跟风，投行界顿时腥风血雨，欧美两地高级 Banker都想过嚟亚洲搵食，一来税平，二来可逃避针对银行家嘅重税。唔知汇丰大班又系咪因为咁转嚟香港返工？短线关键，要睇奥巴马打击坐盘交易嘅决心有几大，会否明修栈道，暗渡陈仓，纯系想安抚吓纳税人，否则大行一旦玩抽资，特别系基金爱股被洗，对市场影响可以好大。

中航科工商机大

3个月前，同大家讲过中航科工嘅好妈妈概念，当时股价仲系两个几，近日冲高后回调，正系上次「睇完当买咗」嘅投资者入货机会。公司发盈喜，受业务重组刺激， 09年度将由亏转盈。 08年整体仍蚀 11.57亿元(人民币．下同)，即单靠卖晒「有毒」嘅汽车业务畀阿妈，财务已大幅改善。仲有旗下嘅中航电子同样扭亏， 08年度净亏损 4.25亿元，即系话一年间起码赚 4亿几。

唔太了解中航科工嘅朋友，再重温吓佢嘅重组故事。好妈妈中国航空工业集团，将深圳上市嘅中航光电 43%股权注入，换取中航科工旗下东安动力控股权，而东安动力就系上述所讲嘅「毒资产」。重组后公司业绩实时转盈，可见中航光电提供唔少盈利贡献。中航光电唔系太阳能股，而系内地{zd0}连接器(Connector)生产商，即系类似插苏、宽带线之类，连神舟 6号同军方都系用佢，充份发挥航天军工概念。

母公司管理层早前表示会进一步注资，预计未来 3至 5年内将旗下高达 1500亿元嘅航空业务资产注入中航科工，作为母公司整体上市旗舰，中国地大物博，航天设备已不限于xx及警方专用系列，内地有钱人多，对民用飞机及直升机需求增加，商机难以估计。

胡孟青