金融High Tea 2010年2月10日
金融High Tea——够胆买要有力揸
2010年2月10日
美股杜指上日跌104点,结果无震散亚洲股市,日本昨日先开市已经跌唔多,香港开市都顶得吓,只是低开57点,之后跟随内地股市反复回升,午后跟外围反弹,股市持续向上,扭转连续三天嘅跌势,恒指收报19790点,升239点或1.2%。大市交投温和,成交617亿元。
亚洲唔愿多跌
股市跌得多真系会攰,港股有啲唔想再跌的感觉,中环茶友话,昨日不独香港,亚洲股市唔多肯跌,到下午更开始反弹,其实整个金融市场都有少少郁,美元回软,在昨日黄昏时份,欧罗升咗0.4%,澳元升咗0.8%,黄金亦升0.5%,市场开始憧憬希腊债务问题解决,美股期指亦弹,在下午四点港股收市时,杜指期货升紧86点。港股无跟美股插,但美股期指弹港股又跟住弹吓。
茶友话,港股250天线呢个大位在18882点,而19000点都系好重要的心理关口,而家暂时见到有啲支持力,港股在星期一见过低位19423点,就好似唔想再跌,未来取决于外围会唔会再大插。
最近食饭好多朋友捉住陆羽仁问好不好买货,陆羽仁的基调系好友,特别系仍然睇好国货股今年表现,认为内地系收紧啲银根,但唔系xx收紧晒银根,在估计今年内地经济增长9至10%的前提之下,觉得国货龙头股可以买吓,但亦提醒大家要留意风险,因为既然美国政府可以唔救雷曼,无人担保呢种「黑天鹅事件」唔会再发生,要问自己万一出现时自己瞓唔瞓得着,瞓唔着就唔好制啦,起码要定好止蚀位。