青心直说：咪以为真系跌完 2010年02月03日
大市经过 6个交易日于 20000水平以上辗转反侧，形成一个 19800至 21500嘅横行平台，套用股评人惯常术语︰「一系爆上、一系爆落」。专业炒鬼都难以判断，干脆洗手不干，先减磅过年，等个市有明显方向再追都唔迟。

我都明白大家唔炒身痕嘅赌瘾，短线策略唔好放过呢个咁靓嘅横行波幅区。仲记得中石化介乎 6.20至 7.20元嘅长方形吗？由去年 7月到今年 1月中，半年时间唔使用脑低买高沽，足以赚晒成段波幅。捞底却有淆底嘅时候，即使呢浪喺 6.20元买入后，止蚀亦非常近，咁嘅走势简直系「封底必赢长方形」。

全球经济正忧虑退市之际，连最掂嘅澳洲都突然唔加息，令市场 O晒嘴，可见中央稍为收紧银根已牵一发动全身，有理由相信个市要闷埋过年先会出现较明显方向。所以喺呢几百点波幅入面，左手要有 Call，右手要有 Put，恒指牛熊证家喺市场上卖紧嘅都仲算系合理，起码引伸波幅已回落到 30左右，对指数敏感度高啲，即市够位转身。
转炒电讯内容供货商
你可能会话，好多股份好似中国移动、中国人寿及内银股都有见底回升之势，家唔捞底，第日买唔番！不如又开个周线图睇睇，中移动仲系横行，国寿、内银都未脱险，先叫大家暂时唔好嫌赚得少，因为有糊唔食，罪大恶极。

讲开中移动，睇 CCTV见到王建宙喺瑞士参加达沃斯经济论坛，佢同记者讲参观腾讯控股单嘢，系倾合作唔系倾并购，仲有机会收购对方部份业务咁话。佢好兴奋咁话好快嘅将来，用手机上网嘅用户将超越计算机。唔好睇小呢个商机，冇 10亿都起码有 5亿人用，相信今年炒电讯股策略又要变。设备股如中兴通讯同中国通信服务等可能会行慢啲，取而代之系提供内容嘅公司，好似腾讯、 A8电媒音乐甚至系中国电信，皆因佢旗下就有强大嘅 21CN。

胡孟青